Limba mission est su programma in lìngua sarda, cun sutatìtulus in italianu chi s'at a podi castiai su domìnigu a is 9.30 in Rai 3 Sardegna e Rai Play.
A movi de su 18 de friàrgiu e finas a su 16 de su mesi de làmpadas duncas, su de tres domìnigus de ònnia mesi s'eis a podi spassiai castiendi custa trasmissioni in sardu chi durat prus o mancu 45 minutus.
Is protagonistas "le Lucide" tenint unu incàrrigu: agatai a is chi sunt contras a s'unificatzioni de sa lìngua sarda e a ddus interessai in sa scritura de unu paperi comunu, bincendi is nèmigus mannus de custa mission: su fronti separatista de sa LIC (lìngua italiana Comuna) e una fortza mala chi ndi bolit bogai po sèmpiri s'impreu e is variantis de sa lìngua isulana.
In custu viàgiu spassiosu is protagonistas ant a fueddai fintzas de àteras temàticas: de sa genti chi megat a si nci andai de is biddixeddas, de s'amori po s'ambienti, de is certus chi esistint de sèmpiri tra su cabu de susu e su cabu de giossu de s'ìsula e de sa revesa cun sa penìsula: su nomonau continenti.
Est unu programma chi contat de un'ìsula diversa, chi arriit de issa etotu; aintru eis a atobiai facis connotas de su panorama artìsticu, culturali, musicali e linguìsticu sardu.
