Est torrada a partire, in Aristanis, sa rassigna literària “Leggendo ancora insieme” ideada dae sa libraja Marina Casta.
Comintzada su 29 de làmpadas 2022, tenet sa punna de “torrare a dare fortza a su sensu tzìvicu pro mesu de sa solidariedade, de sa responsabilidade crìtica e de s’arma, dìliga ma potente, de sa letura” ispiegat s’ideadora.
Sunt istados giai presentados sos libros “Il complotto dei Calafati” de Francesco Abate e “La bambina di Kiev” de Maurizio Onnis, e como tocat a àteros chimbe libros, chi sunt:
“La signora dei fiori” de Ada Lai (13 de trìulas) in ue s’autora at a dialogare cun Sabrina Sanna, cun s’acumpangiamentu musicale de Marta Loddo.
“La settima luna” de Piergiorgio Pulixi (16 de trìulas): s’autore at a dialogare cun Sabrina Sanna.
“S’intelligèntzia de Elias” de Giuseppe Coròngiu (19 de trìulas). S’autore at a dialogare cun Isabella Tore e Antoni Nàtziu Garau.
“Ritratto di donna” de Cristian Mannu (26 de trìulas). S’autore at a dialogare cun Matteo Porru; Paola Aracu at a lèghere carchi estratu de su libru.
Sa rassigna at a finire su 3 de austu cun sa presentatzione de su libru “Donna con libro. Autoritratto delle mie letture” de Bianca Pitzorno, in ue s’autora at a dialogare cun Marisa Uras; Maria Antonia Sedda at a lèghere carchi estratu.
Totu sos apuntamentos sunt in su Museu Diotzesanu Arborense e ant a comintzare a sas 9 de sero (h 21,00).
Sa manifestatzione est nàschida in su 2012 dae “Il Maggio dei Libri”, una campagna natzionale promòvida dae su Tzentru pro sa letura de su MIBACT, chi invitaiat a nche leare sos libros a logos diversos dae sos de semper. S’idea de Aristanis est istada premiada pro duas bortas dae su Ministeru pro sos Benes e sas Atividades Culturales cun una mentzione ispetziale.
“Leggendo ancora insieme” proponet finas presentatziones, leturas e laboratòrios in sas iscolas de àteros comunes sardos.
(GF.P.)
