Sighendi sa missioni cosa sua de servìtziu pùblicu e de amparu de su patrimòniu linguìsticu e culturali italianu, Rai Sardigna at cuncordau giòbia passau su 10 de su mesi de ladàmini, in Casteddu, "Limbas de minoria", su cunvènniu apitzus de is lìnguas de minoria; in sa sea de sa fundatzioni Sardigna.
Cun custus atòbius, sa RAI bolit sighiri sa punna de avalorai is oportunidadis acapiadas a s'amparu e a sa promotzioni de is lìnguas de minoria presentis in su territòriu nostru, cun una atentzioni particulari a is polìticas educativas e culturalis intregadas a is giòvunus.
S'atòbiu est stètiu unu momentu de cunfrontu po fueddai de is fainas chi amparant e promovint is lìnguas minoritàrias italianas , chi rapresentant unu elementu de importu mannu de sa diversidadi culturali in Itàlia. In sa pròpiu dii s'est finas premiau su bincidori de su cuncursu po curtumetràgius fatus in lìngua de minoria "parla Corto!”, punnau a is giòvunus registas e cuncordau a manu de pari cun s'Universidadi de Casteddu; unu cuncursu custu, chi bolit ancorai sa produtzioni artìstica cinematogràfica me in is lìnguas de minoria. Is traballus chi ant a binci, s'ant a podi biri me in is prataformas de RaiPlay e RaiPlay Sound.
