Sa figu “craxolu de porcu” crescit pruschetotu in cabu de giossu de Sardigna (innoi connota po su prus comenti a “craxola”) e in parti de sa Provìntzia de Aristanis (connota finas comenti a "croxu de procu").
Sa figu de prima est a forma de pira allonghiada a tzugu curtzu e a punta strecada.
Su còrgiu est birdi a benadura morita, moddi, pagu atacau a sa purpa.
S’abertura de su culàciu est pitia e acostumat a s’aberri, su tanaxi no est ni longu e ni curtzu e abarrat unu pagu incurbau.
Sa figu de segunda no est ni manna e ni pitia, a forma de pira a tzugu curtzu cun punta strecada.
Su còrgiu est birdi-muritu, grussu, abarrat atacau a sa purpa ma non meda e portat tzacaduras candu est cota.
S’abertura de su culàciu est mesanu-mannu e mesu serrau. Su tanaxi est longu e incurbau.
Calidadi chi bogat figu meda e in duas bortas, sa coma crescit vigorosa in artesa e a nais meda.
Sa figu de prima coit a s’acabbu de su mesi de làmpadas, est a purpa a colori de arrosa, purposa, durci, ni pagu e ni tropu suciosa, pagu aromàtica.
Sa figu de segunda coit a is primus dexi diis de cabudanni, est a purpa a colori de arrosa, purposa, pagu durci, suciosa meda e aromàtica cantu bastat.
Totu e duas figus non abarrant ni mannas e ni pitias e non si pistant meda aprapuddendi-ddas.
Sa figu de prima praxit meda papendi-dda frisca sendi cabudàrgia, sa figu de segunda fait a dda sicai.
