Su Commissàriu po is vìtimas de is reatus de tipu mafiosu e intentzionali violentus at publicau s'avisu po bursas de stùdiu po òrfanus de crìminis domèsticus e po òrfanus de mamma po su delitu de is artìculus 575 e 576 primu comma, n.5.1 de su Còdixi Penali, o po omicìdiu po is delitus de is artìculus 609 bis e 609 octies de su Còdixi Penali.
Movendi de su 31 de martzu de su 2024 e finas a su 28 de freàrgiu de su 2025 fait a intregai istàntzia a sa Prefetura de sa provìntzia de residèntzia po oteni s'assinnamentu de sa bursa de stùdiu po s'annu scolàsticu/acadèmicu 2024/2025.
Is bursas de stùdiu ddas ant a partziri a custa manera:
-
€ 700,00 po frecuentai sa scola primària
-
€ 1.000,00 po frecuentai sa scola segundària de I gradu
-
€ 1.800,00 po frecuentai sa scola segundària de II gradu
-
€ 2.500,00 po is stùdius universitàrius.
Acontessendi de non bastai su dinai, cunforma a is istàntzias arribadas, s'at a amenguai s'importu de sa bursa a manera proportzionali.
A s'istàntzia tocat a ddi auniri certificau de iscritzioni e frecuèntzia po sa scola primària, segundària de primu e de segundu gradu. Po is studiantis univeritàrius, in prus de su certificau de iscritzioni tocat a sterri atestatzioni chi arremonat su de ai sartau, cun resurtau bellu. una parti asuba de tres de is esàminis postus in contu a s'annu po su cursu de stùdiu universitàriu.
In prus, a s'istàntzia tocat a ddi auniri totu cussus documentus chi pertocant is procedimentus penalis passaus, o fadendi-ddus ancora o definius cunforma a is delitus (sentèntzias o decretus) e sa decraratzioni anca su chi fait rechesta narat ca est òrfanu po crìminis domèsticus cunforma a s'art. 2 de su decretu 21 de maju de su 2020, n.71.
Is magiorennis chi faint rechesta depint auniri finas totu is documentus chi atestant de non tenni s'autosufficièntzia econòmica o de tenni unu rèditu prus bàsciu de cussu postu in contu, de borta in borta, po s'ammissioni a su patrocìniu gratuiu a spesas de su Stadu.
