Cenàbura, 3 de maju, a sa ora de is 6 de merii, in su Museu Diocesanu Arburensu de Aristanis nci at a essi sa cunferèntzia “Fauna selvatica sarda: un patrimonio da salvare”, anca ant a pigai parti s'artista Tiziana Sanna, su fotògrafu naturalista Giovanni Paulis a rapresentai su WWF, Gabriele Pinna e Francesco Guillot po sa LIPU, G.Andrea de Lucia e Andrea Camedda po su Centru Recùperu de su Sinis. Elisa Mocci a rapresentai sa Retza regionali po custodiai sa fàuna marina.
S'at a chistionai de sa fauna aresti, de is ispècias tìpicas a riscu de sparessi e de totu is initziativas chi serbint a amparai e custodiai s'ecosistema sardu.
Po s'ocasioni s'artista Tiziana Sanna at a ammostai sa colletzioni de pinturas suas “Tiliguerta” dedicada a sa fàuna endèmica sarda chi at a abarrai finas a su 2 de làmpadas. Paulis at a ammostai is imàginis de is ispècias prus de importu de Monti Arcosu e is progetus chi funt fadendi in s'Òasi. Is rapresentantis de sa LIPU ant a chistionai de is pillonis ispèrdius, mentras is rapresentantis de su CreS ant a chistionai de tostoinus.
