Su Museu de sa statutària preistòrica in Sardigna s’agatat in Làconi in su Palatzu de is Aymerich, in mesu de bidda in pratza de Marconi a su nùmeru tzìvicu 10.
S’istitutzioni de su Museu est de su mesi de onnisasanti de su 1996 candu fiat in sa domu comunali, agoa, una borta comporau su Palatzu de is Aymerich, marchesus de Làconi, in su 2010 nci ddu iant cambiau inguni.
A su prus est connotu comenti a Museu de is menhir (pedra fita) e òspidat arrastus preistòricus de grandu interessu scientìficu.
Est partziu in 11 salas, 10 de custas funt po sa pedra fita e sa statutària antropomorfa preistòrica de sa Sardigna de mesu e de cabu de jossu, in mesu a totu de sa chi ndi arribat de Sarcidanu, Mandrolisai e Ghìghini, in s’àtera sala s’agatant imbecis repertus aciapaus in logu de tumba megalìtica in Sarcidanu, in mesu a totu sa de Pranu ‘e Arranas, Corte Noa e Masone ‘e Pedru, de cultura Abealzu-Filigosa, Bonnànaro e Campaniformi.
Sa pedra fita chi si podit biri est de diferenti tipologia, agataus cussa protoantropomorfa a faci a punta de mìtara ma sena de figura, cussa antropomorfa sena de sessu anca est crara sa cara comenti a nasu e ogus, e is stàtuas-menhir schetas arricas de piessinnus e sìmbulus chi ndi marcant su sessu.
Intra de sa pedra fita, 36 pedras ndi arribant de su sartu de Làconi e funt de trachiti locali bogada de su territòriu (in Mind’’e Putzu de seguru), àteras ndi arribant de su sartu acanta de Samugheo, Àllai e Sant’Antoni chi abarrant diferentis de cussas de Làconi.
In prus de sa pedra fita e de is repertus de tumbas si podint biri in su palatzu sa Capella de famìllia, de stili Neoclàssicu a pranta otagonali e a altari de linna e su pranu nòbili, est a nai su primu livellu de sa domu anca is murus funt cobertus de paperi de s’otuxentus de manifatura Joseph Dufour.
Po podi bisitai su Museu, est abertu, in s’istadi totu is diis, a su mangianu de is 10 a sa 1 de meigama e a su merii de is 3 e mesu a is 7, in s’ierru totu is diis fora de su lunis, a su mangianu de is 10 a sa 1 de meigama a su merii de is 3 a is 6.
Po ndi sciri de prus tocat a telefonai a su nùmeru 0782 693238 o a su 342 3507760 o a scriri a menhirlaconi@tiscali.it o info@menhirmuseum.it
