In Sardigna, belle un’impresa onni tres decrarat chi tenet dificultade a agatare figuras professionales cun cumpetèntzias digitales, capatzas de aplicare limbàgios, mètodos e tecnologias pro aviare protzessos innovativos. Sa graduatòria provintziale est aberta dae Nùgoro cun 35,2%; sighit Aristanis cun su 27,8%; a pustis Casteddu cun su 27,1% e Tàtari cun su 26,2%. A livellu natzionale aberit sa classìfica Terni cun su 59,3% de sas impresas in dificultade, e la serrat Impèria cun su 23,8%.
Nointames custas dificultades, belle su 71% de sas realidades produtivas sardas at postu dinari in sas tecnologias informàticas, in sas fòrmulas organizativas aziendales noas e in sos modellos noos de business, semper prus importantes pro chi sas impresas crescant.
Totu custu essit dae un’anàlisi de s’Ufìtziu de istùdios de Confartigianato Sardegna subra de datos de su 2021 de Unioncamere-Tagliacarne in contu de sas cumpetèntzias digitales de sas impresas.
Intre sas realidades sardas cun prus dificultades a agatare professionistas chi tèngiant cumpetèntzias digitales bonas a gestire e a produire trastos de comunicatzione visiva e multimediale, bi sunt sas de Tàtari cun su 36,5%. A pustis Nùgoro cun su 34,8%, Casteddu cun su 31,7% e Aristanis cun su 28,3%. A livellu natzionale aberit Gorìtzia cun su 54% e serrat Tràpani cun su 28%. Sas atividades sardas chi imbetzes tenent prus dificultades a otènnere servìtzios dae espertos cun capatzidades de aplicare tecnologias 4.0 bi sunt sas de Nùgoro cun su 37,5%, sighidas dae Tàtari cun su 27,4%, Casteddu cun su 26,9% e Aristanis cun su 26%.
“Sa pandemia at fatu crèschere sa domanda de sos imprendidores pro s’impreu de su digitale – narat Fabio Mereu, vitze presidente de Confartigianato Imprese Sardegna e delegadu pro s’innovatzione tecnològica – ma su livellu de familiaridade cun sos trastos tecnològicos est ancora tropu bassu”.
S’Ìsula tenet paga “maturidade digitale” de sas impresas: sos datos de Uniocamere narant chi in un’iscala dae 1 a 4, sas impresas sardas sunt a unu puntu 2, chi est in crèschida contra a pagos annos a como. In sa regione nostra sa maturidade digitale est creschende, màssimu in sas impresas de servìtzios e de manifatura (paragonadas cun sas agrìculas), in sas atividades de dimensiones mèdias (paragonadas cun sas piticas meda) e in sas atividades chi traballant a intro de una filiera (paragonadas cun sas chi tenent raportos cun su cliente finale e cun su mercadu).
“Su virus at fatu mòvere sa digitalizatzione de sas impresas – sighit Mereu – cun sas atividades chi ant puntadu in manera particulare subra de su “cloud”, pro agiuare su traballu de sos dipendentes in smart working, e subra de sos pagamentos eletrònicos pro acuntentare sa domanda de sos consumadores chi non podiant essire dae domo. A bellu a bellu, però, ant dadu cara a sa seguresa informàtica, investimentu chi in custu momentu est pròpiu istratègicu”.
Contra a su 2018 sas impresas sardas chi impreant su cloud e sos pagamentos eletrònicos sunt crèschidas de 8 puntos pertzentuales, sas chi impreant trastos pro sa seguresa informàtica e chi ant aviadu su cummèrtziu eletrònicu sunt crèschidas de 9 puntos.
Creschende sa digitalizatzione creschent finas sos arriscos pro sa seguresa e sa privacy. In Itàlia non sunt ancora bene craros sos perìgulos cullegados a sos crìmines informàticos: in sos ùrtimos annos est crèschidu meda su nùmeru de impresas chi dant trastos e servìtzios pro cuntrastare custa minetza noa. In Sardigna sunt creschende – passende dae 75 a 77 – sas impresas anti-hacker, chi a livellu natzionale sunt belle a canta a sas 3.000 unidades.
“In onni casu – agiunghet Mereu – sas impresas, pro parare fronte a sas isfidas tecnològicas e gestionales, devent tènnere cumpetèntzias digitales abbinadas, comente sa padronàntzia de nessi duas cumpetèntzias digitales. Pro tènnere custas cumpetèntzias sas dificultades de agatare gente imbatent a su 40% de sa domanda”. Bi cherent ingegneris eletrotècnicos, progetistas e amministradores de sistemas informàticos, analistas e progetistas de software.
In su 2021 sas impresas italianas ant pedidu cumpetèntzias digitales de base pro sa comunicatzione visiva e multimediale a 2,8 milliones de profilos professionales chircados (su 60,5% de su totale de sas intradas), abilidades relativas a s’impreu de limbàgios e mètodos matemàticos e informàticos a 2,3 milliones de positziones (su 50,5%) e capatzidade de gestione de solutziones noas 4.0 a 1,7 milliones de intradas (su 36,4%).
In prus, a una parte de chimbe de sos chi cherent assuntos si lis pedit chi tèngiant capatzidades de base pro gestire e produire trastos de comunicatzione visiva e multimediale, e sunt finas contadas importantes meda sas cumpetèntzias matemàticu-informàticas e de gestione de solutziones noas (su 16% e su 10,9% de sas intradas programmadas).
“Sa digitalizatzione progressiva de s’economia italiana e sarda – finit su vitze presidente de Confartigianato Imprese Sardegna – est istada afortigada dae sos investimentos e dae sos agiudos a s’Impresa 4.0, chi at creadu oportunidades meda de crèschida pro unu setore (su de sas impresas digitales) chi pro tempus meda non fiat resurtadu a essire a campu. Custas realidades, in prus, si sunt distinghende finas pro sa trasformatzione contìnua de sos protzessos traditzionales, immaginende comente ant a èssere sos de unu cras, pro los megiorare e pro dare un’esperièntzia de produtos e servìtzios chi in antis de oe non si podiat mancu immaginare”.
(GF.P.)
