Ocannu puru su Comune de Aristanis est in prima lìnia in sa Die internatzionale contra de sa violèntzia a sas fèminas.
Pro sa de chimbe editziones de s’eventu “Oristano città della ceramica dice no alla violenza – Neanche con un dito!”, s’Assessoradu a sas Atividades produtivas paris cun sos Assessorados a sa Cultura, Istrutzione pùblica, Polìticas sotziales e Isport at aprontadu unu programma de initziativas ricu meda, in collaboratzione cun su Tzentru contra de sa violèntzia a sas fèminas “Leonora”, cun s’assòtziu “Prospettiva Donna”, cun A.I.C.C., FIDAPA, Pro Loco, Fondazione Oristano, cun sos tzeramistas locales, cun su Rotary Club, sa Consulta de sos Giòvanos e sos assòtzios isportivos de su territòriu.
“Aristanis si torrat a impignare subra de unu tema chi, a dolu mannu, est semper atuale e tocat a bi mantènnere s’atentzione arta – ispiegat su sìndigu Massimiliano Sanna -. Sa violèntzia contra de sas fèminas est unu male sotziale chi non cheret lassadu arraighinare. Aristanis tenet una sensibilidade particulare subra de custu tema, la tenet pro s’istòria sua e pro s’impignu cuncretu chi ponet ancora in òpera. Non nos podimus ismentigare chi Aristanis est sa tzitade de Leonora de Arbarè chi at fatu sa Carta de Logu, unu de sos esempros prus antigos de còdighe de leges, abarradu in vigore finas a su 1800, in ue b’aiat pròpiu normas contra de sa violèntzia a sas fèminas. Est de 6 sèculos in antis de oe, custu esempru mannu de tziviltade giurìdica, sotziale e morale chi in custa die signalada mustrat s’atualidade de su pensamentu de Leonora”.
“Ant a èssere tres dies prenas, chi nos ant a permìtere de pensare e de fàghere pensare a sa violèntzia contra de sas fèminas – agiunghet s’assessore a sas Atividades produtivas Rossana Fozzi” -. S’islogan est “Neanche con un dito!”: sintèticu e simbòlicu, est un’invitu e un’avertimentu a su matessi tempus, pro non fàghere peruna atzione de violèntzia, mancu cun unu pòddighe”.
“Sos istudiantes ant a èssere sos protagonistas de custa die – ispiegat s’assessore Fozzi -. Comintzamus chenàbura 25 de santandria cun un’atopu-dibàtidu in su Teatru Garau, sighimus sàbadu, semper in su Teatru Garau, cun unu flash mob in pratza Leonora e cun un’ispetàculu teatrale dedicadu a sa giuighissa e serramus domìniga cun sa Caminada e sa Cursa in colore de rosa. Totu sas atziones de su programma ant a fàghere promotzione a su nùmeru gratùitu 1522 chi est semper a disponimentu de chie cheret pedire agiudu e denuntziare atziones de violèntzia”.
Leghe su programma cumpletu in su situ de su Comune de Aristanis (https://www.comune.oristano.it/it/novita/news/Oristano-citta-della-ceramica-dice-no-alla-violenza.-Neanche-con-un-dito/).
(GF.P.)
