Su Carrasegare tenet màndigos e durches chi sas massajas cuncordant in custas dies; durches frissos, lichitosos, papados ancora callentes o chi si podent cuncordare pro ddos mandigare fintzas a pustis de carchi die comente sos màndigos de gustare fritos o callentados: sa gheladina e sa fae cun lardu, corgiolos e/o concale. Pro sa petza de porcu est s’istajone sua: su concale cotu cun sa fae e erbas de sartu comente fenugru e beda; sa gheladina fata cun sos pees, sas origras e sa conca de su porcu; sartitza e àteros salumes. Sa gheladina non tenet bisòngiu de frigorìferu e abarrat bona pro unas cantas dies, duncas, a dda cuncordare in cantidade manna pro su Sàbadu de Carrasegare cheriat nàrrere a tènnere s’ite papare mancari fintzas a su Martis de coa e a tènnere su tempus pro si dedicare a ballos e ispàssios.
In carrasegare non podent mancare sas tzìpulas: sa pasta modde si ghetat cun unu cuneddu o un’imbudeddu in s’ògiu callente e cun s’agiudu de unu fustigu si frient ispirales mannas cantu sa sartàina, fintzas chi sunt in colore de oro; callentes si passant in su tzùcaru. Cando si faghent sas tzìpulas si nde preparat una cantidade chi si nde potzat dare a amigos e parentes. A bortas sas tzìpulas sunt sa chena de sos seros de carrasegare.
Cun su casu friscu o su regotu si faghent sos rubiolos: s’impastu si friet in cantidades piticas, tundas o unu pagu illonghiadas e, ancora callentes, si passant in su tzùcaru. Una borta si faghiant fintzas pro Pasca de frores, Corpus Domini, Mesaustu cando in sas domos de sos massajos non mancaiant casu friscu e regotu.
Sos culurgiones frissos, delicados in su sabore e in s’aspetu, sunt de pasta violada (sa farina est cariada cun s’ògiu de porcu) a matza de sàmbene (sàmbene de porcu cun saba e àteros ingredientes) o matza de mèndula o pistiddu o marmellada (su prus de chidòngia).
E pro acabbare si podent ammentare sas meravìllias: sa pasta de farina traballada cun ògiu de porcu, si podent agiùnghere oideddos, si tirat fina, si segat in formas diferentes: retàngulos, nastros intritzados, fintzas manos cun pòddighes longos, si friet; cando sunt ancora callentes si ponet su tzùcaru.
(MM)
