Torrat a incomintzare s’atividade de s’Asl de Aristanis pro pònnere a sos canes su microchip e ddos iscrìere a s’anàgrafe canina. Su microchip est comente una carta de identidade de su cane chi agiudat a dd’atzapare si ddu furant o si si perdet.
Sa novidade como est ca, pro agiudare a sos tzitadinos e prus che totu a sos chi bivent prus a tesu, in periferia, in prus de sos “microchip day”, sas dies dedicadas a pònnere sos microchip gratis organizadas in sa biddas dae su Servìtziu Anàgrafe canina, paris cun sos Comunes, sos veterinàrios Asl ant a fàghere s’operatzione a domitzìliu, semper gratis, pro sos canes chi bivent in sas aziendas agrìculas o de allevamentu de sa provìntzia de Aristanis.
Sos meres de custos canes podent fissare un’apuntamentu cun s’istrutura Anàgrafe canina, telefonende a su nùmeru 345 6619323 su lunis e sa giòbia dae sas 10.00 a mesudie (h. 12.00) o mandende unu messàgiu de posta eletrònica a s’indiritzu: anagrafecanina.randagismo.centro@pec.atssardegna.it
Postos de acordu pro sa die e s’ora, ant a èssere sos veterinàrios Asl a andare a s’azienda pro pònnere su microchip a su cane.
Iscrìere sos canes a s’anàgrafe canina est un’òbligu de lege; sos meres chi non ddu faghent diant a pòdere pagare una santzione de 150 fintzas a 300 àuros.
(MM)
