Sa Giunta comunale de Aristanis, a pustis de sa proposta de s’assessore a sos Traballos pùblicos Simone Prevete, at aprovadu sos progetos de fatibilidade tècnica e econòmica cherende fàghere impiantos isportivos noos pro garas in fora e modernare sos chi giai esistint in Toràngius.
“Sunt duos interventos importantes meda chi ant a permìtere de megiorare s’atividade isportiva de sa tzitade e de su bighinadu de Toràngius in manera particulare – ispiegat su sìndigu Massimiliano Sanna -. Sos duos progetos, pro unu totale de millione e mesu de èuros, s’ant a pòdere fàghere gràtzias a su dinari postu a cùrrere cun decretu de sa suta-segretària a sa Presidèntzia de su Cussìgiu cun dèlega a s’Isport, in sas atividades aparitzadas dae su Pranu natzionale de Ripresa e Resilièntzia pro Isport e Inclusione, chi tenet assignados in totu 700milliones de èuros pro megiorare sas tzitades faghende impiantos isportivos o megiorende sos chi bi sunt giai”.
“S’interventu prus importante est su de 900mìgia èuros pro impiantos noos in logos abertos – ispiegat s’assessore Simone Prevete -. Gràtzias a unu finantziamentu de su PNRR pro s’isport e s’inserimentu sotziale amus a fàghere impiantos pro fàghere disciplinas isportivas noas comente su padel, su patinàgiu cun rodeddas, su tennis e sa pallavolo de ispiàgia. In prus, àreas atretzadas pro fàghere atividade fìsica, pro passigiare sos canes e pro giogare, a curtzu a sa tzitade isportiva de Toràngius in ue semus faghende finas megioros in sos impiantos pro su fùbalu a 5, sa pallacanestro e su tennis. Est in programma finas de potentziare sas lughes in sos percursos chi esistint giai, intrende dae carrera Fermi e andende a cara a sa pista de patinàgiu noa, finas a sos campos de tennis. S’illuminatzione at a èssere a led”.
Sos campos de padel (tipu Italgreen) a curtzu a sos campos de pallacanestro e de fùbalu a 5 ant a tènnere sa lughe, e in unu s’at a pònnere finas una cobertura de “tenso struttura” a manera de la pòdere ispostare.
Sa pista pro patinàgiu a rodeddas si ponet in s’àrea in ue fiat su campu de fùbalu a 11 bonificadu boghende.nche sa cresura e sos faros chi bi fiant.
Sos campos pro pallavolo e de tennis de ispiàgia si ponent in ue fiant sos campos de pallavolo.
B’at a àere finas logos in ue fàghere atividade fìsica, logos pro giogare e logos pro passigiare sos canes.
“Su segundu progetu de 600mìgia èuros previdet de megiorare su campu de fùbalu a 5, su campu de pallacanestro e sos campos de tennis, e de acontzare sas cabinas de sos campos de tennis e de pallacanestro – sighit s’assessore Prevete -. Custos duos progetos si cumpletant pari-pari e permitint de torrare vitalidade a sos impiantos isportivos de Toràngius, su bighinadu prus populadu de sa tzitade chi però tenet pagos servìtzios”.
(GF.P.)
