Su Comune de Aristanis at a fàghere unu pranu nou de mobilidade sustenìbile e unu pranu urbanu pro su tràficu. Sos ufìtzios ant a fàghere afidamentu diretu de s’istùdiu, pro mesu de SardegnaCat, cun unu prètziu a base de gara de 85.400 èuros (contende s’Iva).
Sos pranos noos sunt pretzisos ca, dae su Pum adotadu in su 2017, su territòriu de Aristanis est cambiadu a pustis de àere fraigadu tzentru intermodale e tzircumvallatzione Ovest, de àere eliminadu sos passàgios a livellu e de àere realizadu paritzas rotatòrias.
Su pranu urbanu de mobilidade sustenìbile – chi tenet un’isetu nessi de 10 annos – at a dèvere megiorare su tràficu e sa seguresa istradale, minimare s’incuinamentu acùsticu e atmosfèricu e agiuare a risparmiare energia.
A analizare sas crititzidades de sos ispostamentos istradales e a pònnere in campu interventos pro los megiorare at a agiuare a minimare su tràficu. Intre sas punnas b’est finas de torrare a organizare in manera cumbeniente sa sosta de sas veturas, finas cun prospetiva de impreu de sistemas de trasportu diferentes.
Su Comune de Aristanis diat chèrrere crèschere sos sistemas de mobilidade alternativa e eco-sustenìbile, a manera de minimare s’impreu de màchinas privadas.
S’elaboratzione de sos duos pranos est finantziada pro mesu de su Pcm, a intro de su programma Oristano Est.
(GF.P.)
