Su Museu Diotzesanu Arborense chenàbura 28 de santugaine a sas 6 e mesa de sero (h 18,30), aberit sa mustra AURUM URENS de s’artista Michele Ardu. Un’itineràriu intre fotografias e isculturas, giai ospitadu in sos Magasinos de su Sale de su Palatzu Pùblicu de Siena, chi focalizat s’atentzione subra de sas ruinas chi abarrant cando in unu logu bi passat su fogu. Una regorta de linna brusiada, in ue su fogu at bogadu a campu su segrestu ma finas sa dignidade de sa gherra pro sa vida e sa lughe dae in ue torrare a nàschere.
“In sas òperas de Michele Ardu su tema de s’ambiente essit in manera crara finas pro s’atacamentu chi tenet a sa Sardigna, chi li faghet de ispiratzione e nde faghet essire s’energia pro sa creatzione. In prus, dae sos annos chi at bìvidu in èsteru nde essint contaminatziones cun àteras culturas. Custos temas sunt giai presentes in una prima sèrie fotogràfica intitulada “In Re Quieta” de su 2016, chi contat su ligàmene seculare intre òmines e caddos” (F. Campana).
Sa mustra AURUM URENS faeddat de sas cunseguèntzias de su fogu orrorosu chi in s’istiu de su 2021 at brusiadu su Monteferru distruende prus de 20mìgia ètaros de territòriu, cun buscos, domos e aziendas. Dae cussos terrinos, Ardu nd’at seberadu pìculos de linna iscampados a su fogu, faghende.nde màgines de oro brusiadu, in ue onni marcu e brusiadura sunt sinnales de vida chi resistit.
Sa mustra, patrotzinada dae sa Presidèntzia de sa Regione Sarda, dae su Corpus Forestale e dae s’Assòtziu Culturale “Oristano e Oltre” l’at a inaugurare s’archipìscamu mussegnore Roberto Carboni paris cun su presidente de sa Regione Sarda Christian Solinas su mangianu de su 28 de santugaine. At a èssere aberta finas a su 29 de ghennàrgiu 2023 cun sos oràrios chi sighint:
mèrc. h 10,00-13,00
gio., chen., sab., dom. h 10,00-13,00 e 17,00-20,00.
(GF.P.)
