Su 13 de maju 2022 est partidu su progetu “Museo a cielo aperto – vista in città”.
Su cuncursu de ideas, promòvidu dae s’Assessoradu a sa Cultura de su Comune de Aristanis, l’at bìnchidu s’architetu vènetu Luca Zecchin e previdet chi in cursu Umberto e in sa carrera de Castro si pòngiant una sèrie de òperas artìsticas suspesas in artu.
In su cursu ant giai postu 70 brocas fatas de materiale lèbiu, cun lughe interna e apicadas a astas de 3 metros cullegadas a unu “telàrgiu” de funes.
Sas brocas, òperas artìsticas chi tenent finas valore identitàriu, sunt postas pro invitare a abbaidare a cara a chelu, significhende chi tocat a abbaidare a su cras e a su logu in ue si bivet. Ammentant sos temas culturales e istòricos de sa tzitade. Sos colores dant un’elementu de novidade chi dat prus valore a sa traditzione tzeramista de Aristanis.
Punna de s’Assessoradu a sa Cultura est de favorèssere sa partetzipatzione de sa gente a unu progetu pro megiorare su tzentru istòricu e lu fàghere prus ospitale non pro sos turistas ebbia ma pro totu sos aristanesos.
(GF.P.)
