In Quartu aintru de sa rassinna literària "ViaConvento", nascit s'Ofitzina de is Lìnguas de Minoria, unu logu e unu tempus intregau a is autoris e a is òperas in is lìnguas minoritàrias.
In custa primu editzioni ant a arrexonai autoris chi ndi benint de sa Sicìlia, de sa Sardigna, de su Friuli e de is Astùrias in Spagna e autoris de lìngua catalana de s'Alighera.
"Nemus si depit intendi stràngiu in unu stadu democràticu, feti poita ca fueddat una lìngua diferenti da sa chi fueddat totus", aici at nau su sìndigu de Quartu Milia, arremonendi is fueddus de su presidenti de sa Repùblica Mattarella.
Aintru de custa faina sunt prevididus unus cantu laboratòrius cun is autoris.
At a cumentzai cenàbura su 22 de donniasantu Roberto Alajmo.
Sàbudu su 24 de donniasantu de mangianu, Patrizia Serra at a presentai s'òpera cosa sua 'Libellus Iudicum Turritanorum', at a sighiri Gavino Balata, cun su traballu in lìngua catalana 'Soldats Abbandonats'.
A movi de is cuàturu e mesu de merì su scritori friulanu Gianluca Franco, at a fueddai de su lìburu 'Une storie sole', mentras sa scritora asturiana Blanca Fernandez Quintana, bincidora de su prèmiu Ostana 2022 e Ondras 2023 at a fueddai de literadura fantàstica.
At a èssiri presenti fintzas su poeta cuartesu Antonio Pani. At a acabbai sa manifestatzioni domìnigu su 24 de donniasantu Francesca Bellino cun "Il canto libero della stella mediterranea'.
