S’unidade operativa de Neuroriabilitatzione de s’ispidale Santu Martinu de Aristanis, dirìgida dae su dotore Andrea Montis, at ativadu s’ambulatòriu fisiàtricu de primu livellu pro sas primas vìsitas e pro cussas de controllu.
Su servìtziu, operativu dae su mese de santandria, leat in càrrigu sos malàidos esternos pro sa diàgnosi e sa terapia, a incuru de su fisiatra, de maladias o sìndromes dolorosas chi dant disabilidade a sa persone.
Sos servìtzios ofertos sunt sa vìsita fisiàtrica de primu livellu e sos tratamentos e prescritziones de protzeduras diagnòsticas e/o sa terapia farmacològica, fìsica e riabilitativa, cando pro su dotore sunt netzessàrios a sos malàidos.
S’ambulatòriu, abertu totu sos martis in s’oràriu 9.00 - 13.00, est a su de tres pianos de sa parte P; tocat a leare s’apuntamentu prenotende in su Cup (Tzentru ùnicu de prenotatzione), telefonende a sos nùmeros 1533 dae rete fissa o 0783 317293 dae telefoneddu, dae su lunis a sa chenàbura dae sas 8.00 de mangianu a sas 06.00 de sero.
Su servìtziu nou de sa Neuroriabilitatzione – unu de sos giassos de riferimentu pro sa sanidade regionale – est parte de unu progetu prus mannu pro aumentare e ativare sas curas riabilitativas, cun sa punna de assegurare a su malàidu unu percursu organizadu dae s’ispidale chi aunit sas istruturas riabilitativas de su territòriu de sa provìntzia.
(MM)
