Ocannu Non solo Incontri di Musica Popolare, initziativa culturale imbentada trintasete annos a como e semper a incuru de s’assòtziu Onnigaza, in collaboratzione cun s’Istitutu Superiore Regionale Etnogràficu (ISRE), est dedicada a sa devotzione manifestada cun su cantu e sa mùsica traditzionale e a su cuncordu de màndigu pro torrare gràtzias a Deus.
Sos addòbios ant a èssere duos: giòbia s’ 08 de nadale e domìniga s’11 de nadale 2022, in s’Auditorium comunale de Ilartzi, a sas 05.00 de sero.
S’8 de nadale 2022 Marcello Marras e Marinella Marras ant a faeddare de sa devotzione in mùsica in sa traditzione ilartzesa.
Marcello Marras, antropòlogu, at a faeddare de sos sonos e cantos sacros de sos repertòrios de sos òmines de Ilartzi, mentres Marinella Marras, istòrica de sas traditziones populares, at a fàghere osservatziones e riflessiones pro su chi pertocat sos repertòrios de sas pregadorias cantadas dae sas fèminas.
Domìniga, s’ 11 de nadale 2022, in collaboratzione cun s’Istitutu Superiore Regionale Etnogràficu (ISRE), at a èssere projetadu su film S'Impinnu (Il voto) de Ignazio Figus e Cosimo Zene.
(MM)