In su pranu de perda niedda vulcànica de Abbasanta b’at unu muntone mannu de monumentos archeològicos de s’edade nuraghesa: nuraghes, tumbas de gigantes, domus de janas, perdas fitas, putzos sacros. In su sartu de Abbasanta cussu de su nuraghe Losa est unu giassu archeològicu istudiadu, connotu e visitadu meda.
Su nùmene de custu nuraghe benit dae ‘nuraghe de losas’, chi cheret nàrrere de sas tumbas e sas tumbas sunt sas urnas, sos lacheddos in sas perdas, in ue sos Romanos in custu sartu poniant su chinisu de sos mortos issoro. Prima de sos Romanos, sos sardos antigos, prus o mancu in su 1500 – 1200 in antis de sa nàschida de Gesùs Cristu aiant fraigadu custu nuraghe bellu, mannu, imponente, chi catura sa vista a chie, a dies de oe, passat in s’istrada istatale 131 in su tretu de sos chilòmetros 123/124.
A inghìriu de su monumentu s’agatant rastros de àteros fràigos de època nuraghesa; de sos lacheddos de sepultura in època romana; fintzas de su Medioevu.
Su nuraghe tenet una forma insòlita, cun sa base a triàngulu e tres turres; si podet visitare a intro, intrare in sos aposentos – mannos e piticos – e in sos nitzos mannos, osservare sos magasinos pro custoire materiale diferentes e fintzas una tzisterna, pigare in sas iscalas e arribare a 13 metros in artu. Acanta bi fiat una biddighedda de pinnetos; unu mannu fortzis serbiat pro sas reuniones chi custu pòpulu antigu faghiat pro detzìdere cosas importantes e fortzis fintzas pro funtziones rituales.
Su nuraghe Losa est istadu su primu chi ant istudiadu cun sa punna de s’istùdiu e chirca archeològica. Sos primos iscavos ddos ant fatos Filippo Vivanet e Filippo Nissardi in su 1890; in su 1893 est diventadu de s’Istadu; in su 1915 at sighidu s’òpera de s’istùdiu su subrintendente Antonio Taramelli e a metade de su 1900 dd’at istudiadu s’archeòlogu Giovanni Lilliu; dae su 1970 sos subrintendentes Ferruccio Barreca e Vincenzo Santoni e àteros archeòlogos ant sighidu cun iscavos, istùdios, acontzos e atividades de valorizatzione.
(MM)
