Ocannu puru Halloween in Aristanis s'afestat in sa pratza de Eleonora.
Giòbia su 31 de su mesi de ladàmini difati, sa pratza de Eleonora, at a èssiri cuncordada a tema Halloween e cun giogus e spetàculus chi ant a movi de is cuatru de merici e finas a sa mesunoti.
Est prevididu finas unu laboratòriu po imparai a traballai sa crocoriga; nci ant a èssiri baby dance e trucabimbi, paperotus e caramellas po totus is pipias e pipius.
A movi de is ses e mesu de merì ant a sonai is “Thor’s Sonner”, una truma de giòvunus chi at a ammostai sa mùsica rock cosa sua a su pùblicu aristanesu. A is otu invecis at a sonai sa Cartoon band “SUPEREROI”, de Casteddu, chi at a fai is cantzonis de is cartonis animaus prus nodidus.
A is dexi, po acabbai su merì, at a sonai sa band “The Dark Side”.
Po totu sa dii s'at a podi comporai cosa de papai e bufai me in is puntus cuncordaus dae sa proloco.
