Oi su 26 de cabudanni est sa "Dii europea de is Lìnguas"; in Sicìlia s' atòbiu"Le Lingue Regionali di tre grandi isole mediterranee, chi si podit sighiri in lìnia.

Ònnia annu su 26 de cabudanni s' afestat sa Giornada Europea de is lìnguas, istituida de su Consillu de Europa in su 2001. Sa giornada nascit cun sa punna de afortiai e spainai sa cultura e sa connoscèntzia de is lìnguas e de sa diversidadi insoru.

S'initziativa bolit promovi su plurilinguismu che aina po agiudai a si cumprendi tra pòpulus e boloti èssiri una manera de amparai is lìnguas regionalis e minoritàrias.

Po su Consillu de Europa, is lìnguas regionalis sunt una parti de importu mannu de s'arrichesa culturali de su continenti e s'amparu insoru est fundamentali po ndi pesai una sotziedadi europea chi s'arreit asuba a is printzìpius de democratzia e diversidadi.

In Sicilia, cumenti in àterus logus meda de Europa, in custa dii s'apariciant unus cantu eventus, po sensibilizai sa genti a sa chistioni. Innoi s’AUCLIS (Assòtzius aunidus po sa Cultura e Lìngua Siciliana) at cuncordau s'eventu, chi at a èssiri trasmìtiu in lìnia, "Le Lingue Regionali di tre grandi isole mediterranee", chi at a fueddai de is lìnguas de is tres ìsulas de su Mediterràneu e duncas de su sicilianu, de su sardu e de su corsu. Po sa lìngua sarda at a èssiri presenti Stèvini Cherchi, Cordinadori de su Collègiu scientificu de s’Acadèmia de su Sardu. S'atòbiu s'at a podi sighiri in YouTube in su canali de s’Acadèmia de sa Lìngua Siciliana.