Pro s’istitutu Don Deodato Meloni de Aristanis sa die de cras, martis 20 de nadale, at a èssere una die importante. S’istitutu, difatis, est faghende un’itineràriu de chirca e connoschèntzia intre enogastronomia e cultura sarda e s’idea est de passare un’ora mandighende paris, in antis de sas vacàntzias de Nadale. S’apuntamentu cun “Oltre il caffè e i salotti letterari” est a sas 4 mancu cuartu (15,45) in sos locales de s’Hotel Amsìcora betzu (carrera Carducci in Aristanis), in ue est sa sede de sos laboratòrios pro s’indiritzu Alberghieru de s’istitutu Don Deodato Meloni.
S’idea, aprontada dae sos dotzentes Antonello Melis, Paola Aracu, Eleonora Ulìana e Andrea Vàrgiu, proponet unu “percursu literàriu” agatende in mesu de sas pàginas de “I Cabilli” de Vico Mossa sos riferimentos enogastronòmicos bonos a dare idea de comente mandigaiant in Sardigna a primos de su ‘900.
In s’interis, in prus de su cafè e de sa partetzipatzione operosa de sos istudiantes de s’Alberghieru, s’at a projetare su cortometràgiu “Nuràlia il paesino lontano di Vico Mossa”, fatu dae su Tzentru de Servìtzios Culturale UNLA de Aristanis e dae s’assòtziu culturale Sa Curadoria.
Sos pitzocos, cun sa ghia de sos professores, ant a curare su servìtziu in sala e ant a lèghere carchi passu bogadu dae cussu “contu longu” ambientadu intre sas duas gherras de su sèculu coladu, passos importantes in riferimentu a sas particularidades de s’indiritzu alberghieru.
S’atopu at a permìtere finas de ammirare sa mustra fotogràfica “Vico Mossa fotografie d’architettura”.
Pro intrare non si pagat nudda.
(GF.P.)
