Dae su 23 de ghennàrgiu est online su situ ufitziale nou de sa Sartìglia, in ue sa Fondazione Oristano ponet a disponimentu finas su servìtziu de billeteria eletrònica pro s’editzione noa de sa Sartìglia, chi s’at a fàghere su 19 e su 21 de freàrgiu 2023.
“Publichende su situ ufitziale nou de sa Sartìglia, sa Fondazione Oristano sighit su traballu de annoamentu de sos giassos web suos, indispensàbiles pro pònnere in evidèntzia su patrimòniu culturale e sas polìticas turìsticas chi su Comune de Aristanis disìgiat” cummentat su sìndigu Massimiliano Sanna.
“Su situ dedicadu a su turismu est online dae unu pagu de tempus, e dae carchi chida finas su situ istitutzionale de sa Fondazione Oristano – agiunghet s’assessore a sa Cultura Luca Faedda -. Bidu chi sa Fondazione como est organismu “in house” de su Comune de Aristanis, semus ponende a postu e creschende sas atividades de comunicatzione pro dare risposta a totu sos bisòngios e pro pònnere a disponimentu de aristanesos e turistas unu sèberu de trastos pro connòschere s’istòria e sas traditziones nostras e totu sas informatziones importantes pro sa bona permanèntzia in tzitade”.
“Su situ nou l’at ideadu e aprontadu Limone Marketing, un’agentzia de marketing ispetzializada in su digitale, cun sede in Aristanis, chi at bìnchidu sa gara de apaltu pro sos sitos de sa Fondazione Oristano e de su turismu in tzitade – ispiegat su presidente de sa Fondazione Francesco Deriu -. Su situ naschet dae su bisòngiu de dare un’aparèntzia promotzionale noa a sa manifestatzione, cun sa punna de la presentare in sa mègius manera e de pònnere curiosidade a sa gente. Est unu situ prenu de immàgines e de argumentos multimediales, chi podet fàghere nàschere emotziones e mustrare a sa gente sa bellesa e sa singularidade de s’eventu”.
Su servìtziu online de bèndida de billetes, chi est comintzadu custu mangianu a sas 10 e est in su sistema software Ticka, permitit de comporare sos billetes pro intrare a sas tribunas a abbaidare sa cursa a s’isteddu e sas parìglias. Si podet pagare ebbia cun carta de crèditu pro mesu de su servìtziu Nexi chi permitit passàgios de dinari seguros, in cunformidade a sos istandard atuales de seguresa. A primu, sos billetes si podent comporare online ebbia, e non faghet a los comporare online in sas 24 oras in antis de sa manifestatzione.
Dae su 13 de freàrgiu sos billetes chi sunt ancora disponìbiles s’ant a pòdere comporare finas in sa sede de sa Fondazione Oristano in carrera Elenora 15.
Sos billetes comporados online s’ant a pòdere ritirare in su buteghinu de su Servìtziu de Billeteria, in sos oràrios de abertura, finas a sa die de sa manifestatzione. Cheret presentadu su voucher, mandadu cun posta eletrònica a pustis comporadu su billete.
Ocannu sos billetes sunt incaridos de 5 èuros, ca sas ispesas de aprontamentu de sa manifestatzione sunt incaridas issas puru.
Dae su 24 a su 31 de ghennàrgiu, in su situ nou, giornalistas, fotògrafos e operadores televisivos chi cherent presentziare a sa Sartìglia ant a pòdere presentare sas richiestas de “accredito stampa”.
Dae su 23 de ghennàrgiu est publicadu finas su manifestu nou de sa Sartìglia cun s’immàgine ufitziale, realizadu dae s’istùdiu gràficu ADWM de Walter Mulas dae una fotografia tirada dae su fotògrafu Stefano Orrù, chi mustrat a su Cumponidori inferchende s’isteddu cun “su stocu”.
(GF.P.)
