In sardu su de ùndighi meses de s’annu tenet duos nùmenes: in cabu de bassu de Sardigna ddi narant Onniasantu, in cabu de susu est Santandria.
Onniasantu, dae su latinu omnis sanctus, ammentat ca in custu mese, sa prima die, s’afestant totu sos Santos; imbetzes, Santu Andria est afestadu s’ùrtima die de custu mese. In sa provìntzia de Aristanis, santu Andria est patronu de tres biddas: Ula, Gonnesa, Sinnarìolo. Pro traditzione sa die de Santu Andria si tocaiat, e si tocat, su binu nou.
Custu mese est fintzas dedicadu a sos mortos; in Sardigna non mancaiant ritos e traditziones pro ammentare e onorare sos mortos, su prus cussos de sa famìllia: sa note de su 1 e 2 de Onniasantu si lassaiat sa mesa aparitzada cun sa chena pro sas ànimas; in unas cantas biddas si allumaiant fogos rituales e fintzas candelas a intro de curcurigas; si essiat a pedire (su prus sos pitzinnos) de domo in domo pabassinos e fruta sicada (a pabassinare, a sos chi addòpiant, su mortu mortu, su pedi cocone, su purgadòriu, is animeddas…).; custa ùrtima traditzione est torrende in paritzas biddas.
(MM)
