Su Comunu de Pàdria at bandiu sa de 22 editzionis de su Prèmiu Literàriu “Gurulis Vetus” intregau a su poeta padriesu Gavino De Lunas.
A su prèmiu podint pigai parti òperas mai imprentadas o premiadas prima, stèrrias in lìngua sarda in cali si siat variedadi, a tema lìberu.
Su cuncursu ponit in contu una setzioni sceti “La poesia per il canto” e si podit mandai unu cumponimentu sceti. Est agradèssia sa tradutzioni in lìngua italiana e unu fueddarieddu po is fueddus pagus connotus.
Is traballus si depint mandai a sa segreteria Organizativa de su prèmiu, in su Comunu de Pàdria aintru de su 21 de làmpadas de su 2024.
Sa premiatzioni s'at a fai sa dii 24 de austu de su 2024 me in is localis de su Tzentru de Agregatzioni Sotziali.
Su Comunu at bandiu finas s'assinnamentu de unu prèmiu speciali a is migrantis “La poesia dei migranti”, abertu a is òperas mai imprentadas o premiadas prima, scritas in lìngua sarda in cali si siat variedadi, ma acumpangiadas de tradutzioni in lìngua italiana e de unu fueddarieddu de is fueddus pagus connotus.
Si podit mandai unu cumponimentu sceti aintru de su 2 de su mesi de argiolas de su 2024. Sa premiatzioni s'at a fai su 24 de austu de su 2024.
Po ndi sciri de prus bai a su giassu istitutzionali de su Comunu de Pàdria
