In lìngua sarda su fueddu 'crogorista' bolit nai in italianu 'cresta (del gallo o di uccello in generale)'. Pittau, in su vocabolàriu etimològicu e fraseològicu cosa sua arremonat su fueddu comenti a arrastu presardianu de acostai a pari cun su bascu ‘kukurusta, kukarasta, kikirista’ chi bolit nai in italianu ‘cresta di uccello’ e cun su fueddu prelatinu CRISTA, ‘cresta di gallo’, in prus totus de acapiai a su fueddu ‘cùcuru’ chi in italianu est ‘sommità del capo’, ma finas a su sonu chi fait su caboni candu cantat (chichirichì).
Est craru, duncas, ca sa pasta in chistioni arregordat sa forma de crogorista de caboni.
Ma andaus a sa retzeta.
Apustis de ai traballau sa sìmbula cun s’àcua e unu spitzu de sali, tocat de dda sterri a pillu fini, seghendi-dda a tallutzas retangularis prus o mancu longas 7 cm e ladas 4 cm.
De innoi manus espertas ddi donant sa forma sua:
1) sterri su didu ammostadori in mesu de sa tallutza (siat in ladiori che in longhiori),
2) pinnicai sa tallutza fadendi-dda passai asuba de su didu ammostadori e asuta de su didu de mesu e de s’aneddu,
3) serrai is duus pillus a ladu de asuba, carchendi in sa pasta is puntas de is didus de s’àtera manu,
4) bogai sa pasta in prus, seghendi-dda a serreta a sa paris asuba de su didu ammostadori po totu cantu andat su longhiori de sa tallutza,
5) bogai su didu ammostadori (e is àterus puru) de sa pasta, lassendi-ddi sa forma buida intra de is duus pillus,
6) segai sa pasta a arcu movendi de sa bucu de custu buidu a su pitzu de sa tallutza,
7) pintai cun sa serreta, fadendi-ddi unus tres o cuàturu segadureddas, in su ladu paris longu.
Po chi ddi bolit donai una forma prus pintada e aberta asuta:
1) una borta fata sa tallutza (unu pagu prus pitia de sa de susu), pinnicai po agatai su mesu, torrai a aberri totu sa tallutza,
2) segai a serreta sa pasta a arcu in ladu de mesu (in mesu depit amancai una mesu luna de pasta) e torrai a pinnicai,
3) segai sa pasta a arcu movendi de su pitzu finas a acanta a s’incàsciu fatu prima (ndi bessit una forma chi assimbillat a una mìgia o, mellus, a una crogorista),
4) aberri, in sa parti prus longa totu sa tallutza e pintai a gorteddu, fadendi-ddi segadureddas totu cantu andat.
Lassai asciutai sa pasta. Una borta cota in àcua buddendi cundiri cun bànnia de petza de caboniscu o de pudda.
