In Busache cun su fueddu “sucu” si fait arriferimentu siat a sa pasta e siat a su mandiari chi si fait cun cussa, cundida.
Po fai sa pasta si usat sìmbula, àcua e sali chi, una borta fata a pillu e lassada a asciutai si arrombulonat e si segat a tallarinus.
Sa pasta si coit in su brou de petza (po su prus ammesturada, de berbei, pudda e boi, cun s'aciunta de cibudda, àpiu, perdusèmini) aciungendi-nci casu friscu unu pagu axedu e tzaferanu, ma non si scolat, antzis si aciungit asuba àteru casu pecorinu friscu a fitas e un'àteru spitzuleddu de tzaferanu, finas a aciupai totu su brou. Una borta ammantau beni e lassau matiri una scuta si podit papai, ancora calenti.
In Busache custu mandiari est su protagonista de sa sagra chi si fait in s'istadi e chi ocannu est arribada a sa de 23 editzionis.
Su D.E.S. arremonat su fueddu “sucu” donendi-ddi su sinnificau in italianu de 'minestra fatta in casa di puro semolino in generale con l'aggiunta di lardo', ma comenti a etimologia non ndi ddu fait arribai de su latinu SUCUS ma de su cadalanu 'suc' chi bolit nai 'la salsa amb la qual es condimenten els menjars'.
