Sa cardallina est una sutaspècia endèmica de Sardigna.
Est unu pilloni chi abarrat piticu, longu non prus de 14 cm candu est firmu e non prus de 25 cm a alas abertas.
Posta acanta de sa spècia principali sa cardallina nosta abarrat prus pitica, portat su pitzu prus fini e est a pinna a colori prus biu e prus arrùbiu in sa faci.
A pitzus de sa conca e a su costau de su tzugu sa pinna est niedda cun una mància bianca in su pistiddu, totu s’àtera de sa conca est bianca.
Sa parti de asuba de sa cardallina e cussas de su costau funt arrubiastas-colori de castàngia. Sa parti de asuta bianca.
Is alas funt longas e nieddas, a tirada de grogu, sa coa est niedda e a màncias biancas.
Su pitzu est fini e curtzu a colori arrosa e is peis arrosa-trinu.
Sa cardallina giòvana est a pinna murra-trina cun màncias a colori de castàngia scura e sena de màscara arrùbia in faci.
Sa manna, in s’ierru portat invècias sa faci prus arrùbia bia e is coloris prus bius.
In atòngiu e ierru papat, inderetura de su fundu e non de terra, po su prus sèmini de fenugu e si nci ghetat meda a su sèmini de su cardu, mentras in beranu e istadi si nùdriat finas de baballoti.
In Sardigna sa cardallina fait su niu e abarrat in su territòriu. abbitat padentis e molas, ma finas logus ùmidus, su sartu prenu de cardu finas acanta de is biddas.
CROSIDADIS LINGUÌSTICAS
Sa cardallina depit su nòmini cosa sua a su fatu ca papat meda sèmini de cardu.
Su fueddu ‘cardallina’ ndi arribat de su spanniolu ‘cardalina’.
A logus custu pilloni pigat su nòmini de ‘cardanera’ chi ndi arribat de su cadalanu ‘cadarnera’ o ‘cadernera’.
