Tocat a fàghere in presse, e a fàghere bene. In pagas paràulas est custu su chi at iscritu su prefetu de Aristanis Fabrizio Stelo in una comunicatzione chi at mandadu a sos comunes e a sas amministratziones pùblicas chi intrant in sos progetos finantziados dae su Pranu Natzionale de Ripresa e Resilienza (PNRR), siat comente titulares siat comente realizadores o entes de controllu.
“Sas lìnias de interventu sunt duas: – ispiegat su prefetu – sa prima est de bìnchere sas dificultades de realizatzione de sos progetos, dae cando naschent a cando si ponent in òpera, ca sas protzeduras sunt dificultosas e sos tempos pro fàghere sas partes progetuales e cuntratuales sunt variàbiles e dipendent finas dae sa mancàntzia de professionistas; sa segunda est de chircare una manera de collaborare intre istitutziones pro chi sa criminalidade organizada non chirchet de nche colare”.
“B’at dinari meda a disponimentu – sighit Stelo – e custu imponet un’impignu particulare pro difèndere s’onestade de sos progetos, amparende.los dae su perìgulu chi nche colet sa criminalidade organizada. Sa Prefetura at a fàghere unu presìdiu de legalidade e at a agiuare, finas in sede de Comitadu provintziale pro s’òrdine e sa seguresa pùblica, onni initziativa de sensibilizatzione, preventzione e, in casu, repressione finas cun s’agiudu de sas Fortzas de s’Òrdine”.
Su prefetu Stelo at aprofitadu de s’ocasione pro pònnere in evidèntzia chi “s’obietivu chi tenimus totus est de gosare de sas oportunidades mannas chi nos oferit unu programma de investimentos chi in antis de oe non si fiat bidu mai e chi, si l’impreamus bene, podet cambiare sas sortes de su territòriu nostru”.
(GF.P.)
