A is chini bolint pigai parti e non dd'at fatu ancora, aintru de is 11 e 59 de noti de su 9 de maju tocat a nci mandai is dimandas de iscritzioni a sa de 17 editzionis de su cuncursu Prèmiu Andrea Parodi. Po s'iscriri non si pagat nudda e s'impreat unu formau aposta chi est in su giassu de sa Fundatzioni “Andrea Parodi” www.premioandreaparodi.it chi est in funtzioni giai de su 18 de su mesi de idas de ocannu passau.
A sa rechesta de iscritzioni tocat a auniri:
-
2 branus, unu in gara e s'àteru fadendi parti de su repertòriu de su cuncorrenti, chi podit essi a sa sola o a grupu
-
testus e, simmai, tradutzionis de is branus
-
curriculu artìsticu
-
àteru materiali, a tipu fotografias, vìdeus e sighendi chi pertocat s'atividadi de su cuncorrenti.
In mesu a tantu, su branu in gara depit essi fatu de testu e mùsica, depit essi interpretau in cali si siat lìngua (italiana, stràngia, minoritària, dialetali e sighendi), non tenni messàgius publicitàrius de genti, prodotus, servìtzius o partidus polìticus.
Una Cummissioni Artìstica at a sceberai, a manera anònima, is cuncorrentis finalistas chi s'ant a esibiri in su Festival Prèmiu Andrea Parodi chi s'at a fai in custu atòngiu.
Po ndi sciri de prus ligi totu su regulamentu chi s'agatat in su giassu www.fondazioneandreaparodi.it
