Sa Provìntzia de Aristanis at agiudicadu is traballos pro nde messare s'erba a oru de is bias de cumpetèntzia sua, prus o mancu 1000 km, pro s'annualidade 2024 e 2025.
Is ditas agiudicatàrias (SOLAM s.r.l. pro su lotu n.1 e S.A.GE.S. sotz.coop.a.r.l. pro su lotu n.2) ant a dèpere assegurare su servìtziu pro messare e iscresurare (erba, ruu, molas, matedu bàsciu, canna e sighende) in is banchinas e in is pertinèntzias de is bias de sa Provìntzia de Aristanis. In prus, est postu in contu finas cussu de nde assoddire s'àliga fuliada e a nche dda portare in discàrriga.
Is traballos ant a inghitzare luego, a cumentzare dae is bias chi portant a mare in previsione de is festividades de Pasca Manna.