Cun sa Lei n.306 de su 16 de su mesi de argiolas de su 1974, chi iat promulgau su Presidenti de sa Repùblica de insaras Giovanni Leone, est nàscia sa Provìntzia de Aristanis.
A is comunus de insaras si ndi funt aciuntus a sa Provìntzia àterus 10 po efetu de sa L.R. 9/2001 (e mudaduras afatantis), de custus unu (Geroni) est andau a sa Provìntzia de su Sud Sardigna in su 2011. A oi faint parti de sa Provìntzia 87 comunus.
Su primu Consillu Provìntziali, elìgiu su 15 de làmpadas de su 1975, si fiat insediau su 9 de cabudanni de cussu pròpiu annu.
Su primu Presidenti de sa Provìntzia est stètiu Antonio Franceschi, de sa Democratzia Cristiana, connotu comenti a Tonino, nàsciu in Tonara in su 1929 e mortu in Aristanis in su 2001.
De insaras a oi is Presidentis de sa Provìntzia funt stètius 11 (Antonio Franceschi, Vincenzo Loy, Francesco Cabras, Maria Teresa Sechi, Peppino Chessa, Ezio Collu, Alfredo Stara, Gian Valerio Sanna, Mario Diana, Pasquale Onida, Massimo De Sennees), prus 1 Cummissàriu Straordinàriu chi est tutora in càrriga de su 2015 (Massimo Torrente).
A sa Presidentessa Maria Teresa Sechi, de su Partidu Sardu de Atzioni, nàscia in Aristanis in su 1942, ant dedicau una pratza in antis a sa sea provintziali in sa bia de Carboni. Est stètia sa primu fèmina a amantai cussa càrriga (in totu Itàlia) de su 1988 a su 1989, curtza po nexi de un'intracoru chi si dda at pigada su 15 de martzu de cussu annu. Primu de essi Presidentessa est stètia a cabu de sa Cummissioni de toponomàstica po assinnai is nòminis de bias e pratzas in lìngua sarda in Aristanis.
Cun Decretu de su Presidenti de sa Repùblica de su 10 de cabudanni de su 1982 a sa Provìntzia de Aristanis ant cuncèdiu stemma e stendartu.
In ocasioni de is 50 annus de vida de sa Provìntzia, su Cummissàriu Straordinàriu, Massimo Torrente, at stèrriu delìbera (n.50/2024 de su 30 de maju de su 2024) po celebrai custa ricurrèntzia cun una carrela de initziativas, in mesu a custas un'ammosta fotogràfica in su palàtziu Arcais su 16 de su mesi de argiolas de su 2024, un'imprenta a nou de su periòdicu “Oristano, 95 Provincia Italiana”, un'annullu de francubullu, ammostu de s'autovetura FIAT 132 cun targa 000001, medallas, publicatzionis, cuncursu de tesi de làurea chi tenint de biri cun sa Provìntzia, cuncordadura de cunvènniu asuba de comenti fiat, comenti est, comenti at a essi sa Provìntzia.
