Sa dirigente de su Setore Afàrios Generales de sa Provìntzia de Aristanis, ponende in pràtica sa delìbera de s'Amministradore Straordinàriu n.50/2024, faghet a ischire ca est publicadu cuncursu pro assinnare prèmios de làurea a laureados chi ant pigadu su diploma de làurea cun una tesi subra de is temàticas chi pertocant su territòriu de sa Provìntzia de Aristanis.
In mesu a totu is prèmios sunt tres e depent tocare temas chi pertocant sa connochèntzia, amparu, valorizatzione e isvilupu de su territòriu provintziale aristanesu.
Sa punna est cussa de agiudare e incorare a is istudiantes a s'istùdiu e a s'aprofundamentu de s'istitutzione Provìntzia de Aristanis e de su territòriu suo.
Su cuncursu est abertu a totu is laureados chi ant otentu su diploma de làurea cun una tesi de interessu in temàticas chi pertocant sa Provìntzia de Aristanis e de su territòriu suo, discùtida intra de su 1 de cabudanni de su 2021 e su 30 de austu de su 2024 cun votatzione mìnima de 100/110.
A su cuncursu podent pigare parte totu is laureados chi apant otentu su tìtulu de istùdiu de diploma de làurea magistrale de 2 annos (o sa chi fiat magistrale ispetzialìstica), de diploma de làurea magistrale a tziclu ùnicu, de diploma de làurea de 4/5 annos de s'ordinamentu bèciu, mentras non podent pigare parte is làureas curtzas e is dotorados.
S'ant a amìtere is tesis de làurea subra de is temàticas chi pertocant sa Provìntzia de Aristanis e su territòriu suo a pitzu de argumentos o disciplinas umanìsticas, iscientìficas, econòmicas, sotziales, chi tenent a ogetu s'istitutzione, su territòriu, s'istòria, sa sotziedade provintziale in àmbitu istòricu, geo-polìticu, in àmbitu giurìdicu, econòmicu, sotziale, artìsticu-culturale, in àmbitu urbanìsticu, paesagìsticu, ambientale e scientìficu.
Su cuncursu ponet in contu de assinnare 3 prèmios pro is tesis de làurea de s'importu, contende is ritenutas le lege, de € 2.000,00 a su primu classificadu, de € 1.500,00 a su segundu e € 1.000,00 a su de tres.
Custu cuncursu est finantziadu cun contributu de sa Fundatzione Sardegna cuntzèdiu pro su progetu aposta pro is 50 annos de s'istitutzione de sa Provìntzia de Aristanis.
Is dimandas pro pòdere pigare parte si depent intregare a intro de su 15 de cabudanni de su 2024.
