Sàbadu 7 de maju 2022 sessanta pitzinnos de 4 e 5 annos ant a fàghere atividade ricreativa e motòria in pratza Eleonora in sa manifestatzione “Oristano palestra a cielo aperto”, chi cheret favorire sa pràtica isportiva e s’atividade motòria de sos giòvanos e cuntrastare sos perìgulos de duos annos de pandemia.
“Oristano, una palestra a cielo aperto” est su progetu de s’assòtziu isportivu “Gymland” realizadu paris cun sos Assessorados a s’Isport e a s’Istrutzione pùblica de su Comune de Aristanis e cun s’adesione de duas iscolas primàrias, sa de su Sacru Coro e sa de Sa Rodia, pro unu totale de 42 classes e 760 pitzinnos.
“Su progetu est nàschidu pro s’iscola elementare, ma cun s’atividade de sàbadu nos aberimus finas a s’iscola de s’infàntzia” narat su presidente de “Gymland” Roberto Porcheddu.
“In custos meses s’est fatu unu progetu mannu de promotzione isportiva e motòria cun sos alunnos de iscola elementare – osservat su sìndigu Andrea Lutzu -. Cherìamus crèschere sas oportunidades formativas pro mesu de progetos integrados intre Comune, iscolas e Gymland, in unu momentu chi sa pandemia at cunditzionadu sas atividades de totus, màssimu de sos istudiantes”.
Pro custa resone, 760 istudiantes e 11 mastros de educatzione fìsica e istrutores federales sunt istados impignados in tantos isport (pallavolo, ginnàstica artìstica, giocoleria, tziclismu, golf, canoa e vela) in sas palestras de sas iscolas e in logos abertos, in su campu prova de su Sinis Golf Club, in su Tzìrculu Nàuticu, in Turremanna e in sa palestra de s’Istitutu cumprensivu 3 “Grazia Deledda” de carrera Santulussurzu.
“Est istada una manera bona pro torrare a sa normalidade e pro dare a sos pitzinnos trastos importantes de aprendimentu isportivu – ponet in evidèntzia s’assessore a s’Isport e a sas Polìticas giovaniles Maria Bonaria Zedda -. Est istada un’atzione bona pro cuntrastare su Covid non cun vatzinos, tampones, mascareddas ebbia ma finas cun atividades cuncretas pro s’integratzione”.
“S’iscola est su logu naturale in ue fàghere crèschere sos giòvanos cun sos valores sanos de s’isport – agiunghet s’assessore a s’Istrutzione pùblica Massimiliano Sanna -. Amus comintzadu cun duas iscolas primàrias pensende chi custu programma podiat devènnere unu patrimòniu pro sa comunidade iscolàstica aristanesa, e pro cussu como semus faghende intrare finas sas iscolas de s’infàntzia”.
Sa manifestatzione s’at a fàghere sàbadu 7 de maju dae sas 10 e mesa (h 10,30) a mesudie e mesu (h 12,30) in pratza Eleonora. Si proet, s’at a andare a sa palestra de s’iscola “Grazia Deledda” in carrera Santulussurzu.
(GF.P.)
