"Parla corto", cuncursu de filmaus curtzus me in is lìnguas de minoria.
Sa Rai, sea regionali po sa Sardigna, paris cun s'Universidadi de Casteddu, ant apariciau unu cuncursu de "cortometraggi" “Parla Corto”, intregau a filmaus fatus in una de is lìnguas minoritàrias fueddadas in Itàlia.
Sa punna de custa faina est stètia cussa de afortiai sa connoscèntzia e s'impreu de is linguas minoritàrias tra is giòvunus.
Sa chistioni de custu traballu depiat èssiri "Is giòvunus, is lìnguas de minoria e su rolu de is mesu de comunicatzioni" acapiau a is temàticas de is deretus, de sa violèntzia de generi, de sa paridadi tra fèminas e òminis, de s'ambienti e de s’agenda 2030.
Su cuncursu fiat punnau a is giòvunus chi ancora no ant fatu 36 annus sa data de scadèntzia de su bandu. Nci fiat tempus fintzas a su 20 de su mesi de cabudanni de su 2024 po nci mandai is traballus chi non depiant èssiri prus longus de 15 minutus e non prus curtzus de 5.
Arregordaus ca is lìnguas de minoria amparadas de sa lei in Itàlia sunt doxi e sunt: s'albanesu, su catalanu, su germànicu, su grecu, su slovenu e croatu, su francesu, su francu-provenzali, su friulanu, su ladinu, s'ocitanu e su sardu.
Su 10 de su mesi de ladàmini de su 2024, s'at a sciri su nòmini de su o de is chi ant bintu su cuncursu. Sa premiatzioni s'at a fai in s'atòbiu “Rai e is lìnguas de minoria: is giòvunus e is lìnguas minoritàrias, su còmpitu de is mesus de comunicatzioni", cuncordau de Rai Sardigna. Su traballu bincidori s'at a podi biri in Rai Play e at a èssiri trasmìtiu a Rai Tre Sardigna.
