In su canale YouTube de su Tzentru de servìtzios culturales de Aristanis est disponìbile una sèrie de letziones curtzas intitulada “Già è poco loffio, non fa a vederlo”, curadas dae Antoni Nàtziu Garau.
Sas letziones punnant a fàghere connòschere sa richesa de su repertòriu linguìsticu nostru, in ue s’italianu regionale faeddadu in Sardigna benit dae su misturu de italianu e sardu.
Sas pìndulas, nàschidas dae un’idea de s’Unla de Aristanis e realizadas paris cun sa sotziedade cooperativa L’Altra Cultura, sunt sete e essint onni mèrcuris in su canale YouTube de su Tzentru (https://www.youtube.com/@CSCUNLAOristano).
Su progetu cheret agiuare a sa gente, màssimu a sos prus giòvanos, a cumprèndere mègius su chi narat, sena pretesas de curretzione ma pro chi si leet cussèntzia de sas particularidades de s’italianu regionale sardu, chi tenet caraterìsticas sintàticas, morfològicas, lessicales e fonèticas chi lu distinghent dae totu sos àteros italianos regionales chi si faeddant in sas àteras regiones de Itàlia, comente ispiegat Garau ammentende finas sos istùdios iscientìficos de Ines Loi Corvetto e Cristina Lavinio.
S’italianu “istandard”, difatis, esistit in s’iscritura ebbia, ca in sa limba faeddada nd’essint a campu sas particularidades linguìsticas tìpicas de sos limbàgios locales, e est giustu chi sa gente cumprendat chi bi sunt e chi sunt una richesa manna.
Custas pìndulas, unu cras, s’ant a pòdere impreare finas in iscola.
(GF.P.)