Unu Cabudanni Aristanesu … in poesia. Gràtzias a sa faina bella pensada dae sa Provìntzia de Aristanis (su Setore Edilìtzia, Istrutzione e Limba sarda, cun s’Isportellu linguìsticu abertu gràtzias a sa Regione Sardigna – Avisu Tu.Li.S. 2024) a manos de pare cun s’Assessoradu de sa Cultura de su Comune de Aristanis, sàbadu passadu s’Hospitalis Sancti Antoni at acasagiadu sa tzerimònia de premiatzione de su primu cuncursu de poesia Tessende rimas – 2025. A sa giuria de espertos, chi nde faghiant parte s’etnomusicòlogu e poeta Pàulu Zedda, s’istudiosu professore muns. Robertu Caria e s’etnomusicòlogu Nàtziu Murru, dd’est tocadu a seberare is mègius poesias in mesu de chimbanta chi nd’at arribadu dae totu sa Sardigna.
Su sèberu intra de totu custas òperas bellas, de livellu poèticu artu siat pro su chi pertocat s’ischema mètricu-prosòdicu, siat pro su chi pertocat su lirismu, no est istadu simpre, at naradu su presidente de sa giuria Pàulu Zedda. Binchidores de sa setzione 1 Repentinas e cantzones a curbas sunt resurtados is poetas Pierpàulu Falqui de Narcau (primu prèmiu), Basile Carta de Sèdilo (su de duos) e Marco Monni de Sìnnia (su de tres). In custa setzione, sa giuria at assignadu mentovos de onore a Juanne Villa de Bitzi, a Pepe Luisi Sassu de Bonàrcadu e a Natalinu Cinus de Santu ‘Èngiu. In sa setzione 2 Mutetos e Mutos is prèmios sunt tocados a Elianu Cau de Neoneli (primu), Micheli Piga de Tramatza (su de duos) e Gilbertu Porru de Mogoredda (su de tres), mentras ant otentu unu mentovu de onore Rachel Falchi de Tàtari, Sara Melosu de Làconi e Albertu Atzori de Sàrdara. In fines, sa setzione 3 Poesia cantada dd’ant binta Pepi Caddeu de Segariu (pro sa repentina), Andria Lampis de Arcidanu (pro su mutetu) e Michela Murru de Prammas (pro sa cantzone a curbas). Mentovos de onore a Nàtziu Lasi de Cirras e a Tòniu Stara de Sabarussa.
A s’addòbiu ddoe at pigadu parte fintzas dot.ra Mònica Norfo, in rapresentàntzia de sa Provìntzia, e Giampàulu Nuscis, presidente de s’assòtziu Arrepentina e Mutetus, chi at contivigiadu su cuncordu de sa faina.
(A. N. G.)
