Sa Fundatzioni Maria Carta at fatu a sciri chini sunt is bincidoris de su prèmiu intregau a sa cantanti sarda, po sa de 22 editzionis. Cumenti a ònnia annu sa giuria at premiau sa mellus boxi de fèmina, su mellus artista sardu, unu tzìrculus de is sardus foras de Sardigna e sa ecellèntzia in àmbitu imprenditoriali.
Is mellus boxis femininas sunt cussas de Tosca e Daniela Pes. Sa prima , sa giuria presidida de Giacomo Serreli,dd'at premiada po sa calidadi chi tenit de fai mùsica sperimentali; una mùsica chi imprassat totu is sonus de su mundu. Daniela Pes invecis at atentu su prèmiu casi ca ndi benit de una annada de sucessus mannus; dd'ant giau finas su prèmiu Tenco po àiri fatu unu traballu mannu a suba a sa boxi e a s'impreu de su fueddu.
Tra i tzìrculus sardus in Itàlia e in su mundu, su prèmiu est andau a cussu de Trieste; inguni difati is corregionalis nostus ant traballau meda e beni po spainai sa cultura nosta e promovi sa Sardigna.
In su setori de s'imprenditorialidadi at bintu su Rockhaus Blu Studio de Tàtari de Alberto Erre, un’azienda chi traballat de su 1989 po promovi e spainai sa mùsica sarda.
Sa tzerimòmia de premiatzioni s'at a fai su primu de su mesi de cabudanni in Sìligo. Arregordaus ca tra is tanti artistas chi ant tentu custu prèmiu ddui sunt Ennio Morricone, Carla Fracci, Alda Merini, Dulce Pontes e Andrea Parodi. In su 2023 ant bintu su prèmiu Teresa De Sio, su Coro Femininu Eufonia de Gavoi, su Tzìrculu “Su Nuraghe” de Alessandria e, su Grupu Nonna Isa.
