Est torra tempus de su prèmiu de poesia in lìngua sarda “Faustino Onnis”.
Su prèmiu nascit po avalorai e afortiai sa cuscièntzia de sa lìngua sarda. Totus is chi pigant parti depint impreai su sardu in is traballus insoru.
Sa de seti editzionis de su prèmiu ocannu s’at a fai in una ocasioni de importu mannu: su Festival de literadura Anderas 2024.
Tres sunt is setzionis in gara:
Primu setzioni – Poesia inèdita.
Segundu setzioni – Prosa inèdita.
Sa de tres setzionis – Poesia improvisada.
Totu is òperas de sa primu e segundu setzioni depint èssiri scritas in lìngua sarda, in una de is variantis cosa suas o in una de is lìnguas alloglotas de Sardigna (tataresu, gadduresu, tabarchinu e catalanu).
Podint pigai parti a sa de tres setzionis in custa editzioni de su prèmiu, poetas mascus e fèminas de sa poesia traditzionali campidanesa, a mutetus longus, a versus e a mutetus frorius.
Sa setzioni nùmeru tres de custa editzioni est intregada a s’arregodu de PAOLA DENTONI.
Is traballus de sa primu e segundu setzioni non depint èssiri connotus , ne bincidoris o sinnalaus in àterus cuncursus.
Is elaboraus depint èssiri furriaus in italianu. Fait a pigai parti a prus de una setzioni.
Po pigai parti a sa de tres setzionis si mandat unu mollu de domanda po inditai is datus personalis e comunicai cumenti si bolit cantai:“a versus”, “a mutetus longus” o a “mutetus frorius”.
Una cida prima de sa dii de s’esibitzioni s’at a fai sciri a is cuncurrentis cali est su calendàriu de is cantadas e sa manera de si sfidai.
A movi de custa editzioni est istituiu su prèmiu Paola Dentoni, po sa cantadora prus brava.
Totu is traballus de sa primu e segundu setzioni, tocat a ddus mandai intra a su 30 de austu de su 2024.
Sa gara poètica e sa tzerimònia de proclamatzioni de is bincidoris cun sa cunsigna de is prèmius de sa primu e segundu setzioni, sunt in programma domìnigu su 20 de su mesu de ladàmini 2024.
