Prèmiu de poesia in sardu, po arregordai su fundadori de s'Istitutu Bellieni
Su Sportellu linguistico “Limba de vida” a manu de pari cun s’Istitutu de stùdius e circas “Camillo Bellieni” de Tàtari, su Comunu de Uri e sa Biblioteca “Giovanni Maria Cherchi” at apariciau su primu “Prèmiu de poesia sarda Micheli Pinna“.
Su cuncursu est intregau a s’intelletuali sardu, docenti de filosofia, scritori, spertu de lìngua e cultura sarda, cordinadori e organizadori de eventus, e finas fundadori e diretori scientìficu de s'istitutu. Ma prustaotu unu poeta.
Su cuncursu fait parti de is atividadis de su progetu “Limba de vida“, finantziau cun su dinai de sa lei chi amparat is lìnguas de minoria e su Comunu de Ossi chi est cabufilera in una retza de comunus ancà ddui funt finas is comunus de Uri, Usini, Ploaghe, Martis e Laerru.
Sunt prevididas duas setzionis: sa primu est cussa po is mannus e sa segunda est intregada a is piciocheddas e piciocheddus chi podint pigai parti a solus , in truma o cun is classis de is iscolas elementaris e mèdias.
Is òperas sunt a tema lìberu, non depint àiri mai pigau parti a àterus cuncursus e non depint èssiri connotas, depint èssiri scritas in sardu e de non prus de 40 versus.
A su cuncursu podint pigai parti mannus e pipius de is comunus de Uri, Ossi, Usini, Ploaghe, Martis e Laerru e ònnia autori podit presentai non prus de tres traballus. Su materiali tocat a ddu cunsenniai me in is bibliotecas de Ossi, Ploaghe, Martis, Laerru, Uri e Usini intra de su 20 de su mesi de ladàmini de su 2024.
Una giurua de 5 spertus at a avalorai is traballus.
Su regulamentu e is mollus po si scriri ddus podeis agatai me in is bibliotecas de is comunus de su sportellu linguìsticu o ddus podeis scarrigai da su giassu in lìnia de su comunu de Uri, sighendi custu link Regolamento e schede di iscrizione
Po àterus acraramentus fait a cuntatai is ufìtzius scriendi a susarduestintotue@gmail.com o fait a sprecuai sa pàgina Facebook “Limba de vida.
Link a su giassu: https://www.istituto-bellieni.it/1-premio-di-poesia-sarda-micheli-pinna/
