Pagas dies a como est imbàtida a Aristanis sa nave Agia Sofia, mòvida dae Brasile cun 16mìgia tonnelladas de pellet. Su càrrigu benit dae sas forestas brasilianas e at a agiuare a regulare su prètziu de su produtu, chi in sos ùrtimos meses nche fiat artziadu meda.
Sa Sardigna onni annu tenet bisòngiu de 240mìgia tonnelladas de pellet, e pro neghe de sa gherra in Ucraina su mercadu europeu non resurtat prus a lu fornire totu.
“In Europa a dies de oe pro neghe de sa gherra non s’agatat pellet” ispiegat Gianluigi Carta de sa Plane Service. “Custu càrrigu imbàtidu a Aristanis est de sos prus importantes in Itàlia. In antis lu batìamus dae Bàlticu e dae Rùssia, ma como cussos mercados sunt firmos. Su sèberu, tando, sunt sos produtores de su Nord e Sud de Amèrica”.
“A su sòlitu tratamus càrrigos de 3-4 mìgia tonnelladas, càrrigu importante che custu non nd’aìamus tentu mai” sighit Carta. “Pro sas operatziones de iscàrrigu nos ant agiuadu su Cunsòrtziu industriale e sos operadores de su portu”. Como su pellet l’ant a imballare e a partzire a totu sos grossistas de Sardigna.
Sa prus parte de su pellet imbàtidu a Itàlia est importadu dae sa sotziedade Ldg Plane Service. “Operadores europeos meda chi in antis esportaiant, como important su pellet” narat Peter Lindgreen, presidente de sa sotziedade danesa Ldg Forest Group. “Como sas provistas benint prus chi no àteru dae Sud Amèrica”.
“Una de sas resones chi nos ant cumbìnchidu a seberare su portu de Aristanis, oltres a sa tzentralidade, sunt sas infrastruturas chi sunt adatas a su chi nos bisòngiat a nois. Custu pro more de su Cunsòrtziu industriale provintziale e de sos operadores de su portu. Intro de sa fine de s’annu diant dèvere imbàtere àteras duas naves che custa: prus pellet imbatet e prus si podet abbacare su prètziu de su pellet”.
(GF.P.)
