Unu signale de solidariedade chi podet dare cuntentesa a chie in custas festas de Natale s’agatat in dificultade.
Pro su de duos annos a fila a pare torrat in Aristanis sa proposta de “Libru suspesu. Christmas edition” fata dae sa Caritas diotzesana arborense, chi cheret pònnere paris sa solidariedade cun sa promotzione de sa letura a mannos e piticos.
A s’initziativa b’at aderidu sa libreria Canu e at a durare pro totu su tempus de Nadale.
Comente funtzionat? Chie nde tenet praghere podet comporare unu libru de donare a sas famìllias chi retzint onni die sos benes de prima netzessidade de sa Caritas diotzesana e de s’Empòriu de sa solidariedade. Sa Caritas matessi s’at a ocupare de nche leare sos “libros suspesos” a sos utentes suos.
Custa idea sa Caritas l’aiat proposta finas in istiu, pensende a famìllias e persones in dificultade, pro sas cales finas unu libru est unu “bene de lussu”.
(GF.P.)