L’ant abertu dae pagas dies, cun sa punna de nche fàghere intrare sa limba sarda a intro de s’ispidale pro afortigare su raportu intre malàidos e personale sanitàriu.
Est s’isportellu de limba sarda abertu in s’ispidale Nostra Signora de Bonària in Santu ‘Èngiu (San Gavino Monreale), nàschidu dae su progetu “Coru Sardu” ideadu in su repartu de cardiologia dirìgidu dae su primàriu Gianfranco Delogu (originàriu de Iscanu) e sustènnida dae su diretore de sa ASL Giorgio Carboni.
S’idea fiat de permìtere a sos malàidos chi benint dae sas biddas de tènnere informatziones in sa limba chi connoschent mègius.
S’isportellu, curadu dae sa dita Boxis, s’agatat in s’intrada a curtzu a s’Ufìtziu de su ticket: una borta a sa chida un’operadore at a èssere a disponimentu de sa gente chi cheret retzire informatziones in sardu. In prus, at a èssere ativu finas in su repartu dirìgidu dae Gianfranco Delogu, pro aprontare sos materiales chi pertocant sas maladias cardiològicas (chi s’ant a pòdere agatare finas in su situ internet de sa ASL) e pro fàghere atividades in sardu chi agiuent a afortigare su raportu intre malàidos e personale sanitàriu.
Su progetu, finantziadu cun sa lege 482/1999 e sa lege regionale 22/2018, previdet finas a sa formatzione de sos operadores sanitàrios, cun cursos gratùitos de livellu base e avantzadu chi ant a agiuare a sos operadores sanitàrios a faeddare in sardu cun sos malàidos e chi s’ant a fàghere in sa mediateca posta disponimentu dae s’Amministratzione comunale.
(GF.P.)
