Sunt abertos sos tèrmines pro presentare domanda pro sos contributos de su programma “Mi prendo cura”.
“Su programma, istituidu dae sa Regione Sardigna, est destinadu a chie godit de sos agiudos de “Ritornare a casa”, chi sunt pro dare assistèntzia a gente cun disabilidade grave meda – ispiegat s’assessore a sos Servìtzios sotziales de su Comune de Aristanis Giovanna Bonaglini -. Est un’interventu nou, chi permitit de parare fronte a netzessidades chi in sas mesuras sanitàrias e sotziales ordinàrias non sunt contadas”.
Su contributu econòmicu si podet impreare pro sas atziones chi sighint.
- rimborsu de ispesas pro comporare meighinas, assistèntzia e pròtesi chi non sunt fornidas dae su Servìtziu Sanitàriu Regionale;
- rimborsu de ispesas pro energia elètrica e de riscaldamentu chi non sunt contadas in sas mesuras sòlitas pro gente in dificultade econòmica;
- rimborsu de ispesas pro s’assistèntzia a sa persone pro chie, tenende presentada sa domanda pro ativare unu progetu nou “Ritornare a casa Plus”, est isetende dae prus de trinta dies a bi l’ativare (cun èsitu positivu dae s’UVT).
Su contributu econòmicu una tantum est de 2.000 èuros a s’annu pro totu sos chi nde tenent deretu, comente rimborsu totale o partziale de sas ispesas. Si dat onni ses meses e bi podet àere minimamentos a tenore de sos datos Isee 2022.
S’avisu pùblicu e su modellu de domanda si podent agatare in s’Ufìtziu Relatziones cun su Pùblicu, in s’Informacittà e in su situ istitutzionale de su Comune de Aristanis (www.comune.oristano.it).
A sa domanda bi cherent aunidos sos documentos chi sighint:
- documentu de reconnoschimentu (vàlidu) de chie faghet sa domanda e de chie nde tenet benefìtziu;
- documentu chi mustrat su pagamentu de sas ispesas pro sas cales si pedit su rimborsu;
- decraratzione personale chi atestat chi sas ispesas non sunt pagadas dae su Servìtziu Sanitàriu Natzionale e dae àteras mesuras in favore de sa gente in dificultade econòmica;
- Decretu de nòmina de Tutela, Curatela, Amministratzione de Agiudu in sos casos in ue serbit.
Sas domandas cherent presentadas a s’Ufìtziu Protocollo de su Comune de Aristanis (manu pro manu o cun posta) o mandadas a s’indiritzu de posta eletrònica istituzionale@pec.comune.oristano.it intro de su 15 de cabudanni 2022 (pro su rimborsu de su primu semestre 2022) e intro de su 31 de ghennàrgiu 2023 (pro su rimborsu de su segundu semestre 2022).
(GF.P.)