Dae custu sero a sas 7 (h 19,00) at a comintzare s’isciòperu de sos distribudores de carburante. In sas autostradas s’isciòperu at a comintzare a sas 10 de note (h 22,00).
Lu cunfirmant Faib, Fegica e Figisc/Anisa, ispieghende chi sa protesta est contra de su decretu trasparèntzia pro sos prètzios de carburante presentadu dae su Guvernu.
Faib, Fegica e Figisc/Anisa ispiegant chi su Guvernu, pro cuare sas responsabilidades suas, est dende sas neghes a sos benzinajos, faghende a cumprèndere chi b’apat trassas pagu craras. “Tocat a torrare sa veridade de sas cosas, pro pòdere comintzare a tènnere unu cunfrontu”.
Sos impiantos de rifornimentu (finas sos self service) ant a abarrare serrados pro 48 oras, dae sas 7 de sero (h 19,00) de oe finas a sas 7 de sero de su 26 de ghennàrgiu. Custu pro sas istradas ordinàrias, imbetzes in sas autostradas sa protesta at a comintzare a sas 10 de sero (h 22,00) de oe e at a durare finas a sas 10 de sero de su 26 de ghennàrgiu.
(GF.P.)