Torrat sa “Befana in piazza” a pustis de sa pàusa causada dae sa pandemia. Sa manifestatzione – chi est imbàtida a sa de bator editziones – est pro sos pitzinnos prus piticos, pro chi festent sa Befana in allegria.
S’apuntamentu est a chenàbura 6 de ghennàrgiu dae sas 11 de mangianu in Pratza de Citadi (piazza Eleonora). Sa festa la sunt organizende sa Consulta de sos Giòvanos, su Rotaract Club e s’Interact Club de Aristanis, cun s’agiudu de s’Assessoradu comunale a sas Polìticas giovaniles.
Prus de 1500 cartzas prenas de durches sunt agiomai prontas a las dare a sos pitzinnos. No at a mancare s’esibitzione de sos Vìgiles de su Fogu de su repartu SAF de Aristanis: su momentu prus isetadu est cando sos vìgiles nde calant dae su Palatzu Carta pro dare sos durches a sos pitzinnos.
Sa Consulta Giòvanos e su Rotaract Club sunt cuntentos meda de s’organizatzione de s’eventu e torrant gràtzias a s’amministratzione comunale, in manera particulare a s’assessore Antonio Franceschi, pro su favore chi lis at mustradu e a sa Pro Loco pro s’agiudu chi at dadu in s’organizatzione.
“Unu gràtzias – si leghet in sa nota ufitziale – finas a totu sos pitzocos chi ant a agiuare a fàghere prus de 1500 cartzas de sa Befana chi s’ant a dare in cussa ocasione”.
Sos preparativos sunt a puntu bonu: “Nos isetamus partetzipatzione meda dae sa comunidade de Aristanis, chi finalmente at a pòdere torrare a onorare custa die a pustis de sos annullamentos causados dae sa pandemia in sos ùrtimos duos annos” finint sos de sa Consulta Giòvanos.
In su 2021 sa manifestatzione l’aiant annuddada, e in su 2022 l’aiant sostituida cun una distributzione de sas cartzas cun sos durches dae domo in domo, in tzitade e in sas fratziones.
(GF.P.)
