Est in funtzione sa prataforma informàtica ùnica a livellu reginale chi ddi narant “SardegnaTrasporti” pro intregare e gestire is rechestas de agiudu de impitadores pro su trasportu aèreu chi movet o arribat a Sardigna.
Est unu sistema nou de agiudos sotziales in su trasportu aèreu, chi abarrat funtzionende a forma isperimentale totu su 2024.
Sa delìbera de sa giunta regionale de su 14 de freàrgiu de su 2024 ponet in pràtica su chi est postu in contu in su decretu ministeriale n.241 de su 7 de su mese de idas de su 2023 cun sa punna de favorèssere s’ismenguamentu de is isbantàgios chi nde essint de s'insularidade, e de incarrerare unu regime de “agiudos sotziales” a favore de is chi tenent sa residèntzia in Sardigna, aici comente ponet in contu s'artìculu 51 de su regulamentu (CE) n.651/2014, de fàghere cun cuntributu. Finas a ispaciare is resursas finantziàrias a disponimentu, a pitzus de su billete pro is lìnias de collegamentu intra de is aeroportos chi nche at in Sardigna e aeroportos chi sunt in su Spàtziu econòmicu europeu.
Su sistema de agiudos est unu reconnoschimentu de unu contributu econòmicu a totu is tzitadinos chi tenent sa residèntzia in Sardigna chi ruent in custas categorias:
-
residentes finas a fàghere 26 annos de edade
-
residentes movende de 65 annos fatos de edade
Is rechisidos de residèntzia e edade tocat a ddos tènnere assora de impreare su trasportu aèreu.
Su tantu de cadaunu agiudu at a mòvere de unu mìnimu de € 25,00 a tretu (parende fache a unu gastu intre € 100,00 e € 125,00) finas a unu màssimu de € 75,00 a tretu.
Sa dimanda de contributu dda depet intregare s'impitadore benefitziàriu o su delegadu suo, impreende sceti su portale “SardegnaTrasporti” sighende custa tempìstica:
-
dimandas chi pertocant bòlidos fatos in su periòdu movende dae s'aprovamentu de is diretivas cun delìbera de sa Giunta regionale a su 31 de su mese de idas de su 2023: a intro e sena de sartare su 31 de martzu de su 2024
-
dimandas chi pertocant bòlidus fatos dae su 1 de ghennàrgiu de su 2024 a sa data de inghitzu de sa prataforma SardegnaTrasporti: a intro de su 31 de martzu de su 2024
-
dimandas chi pertocant totu is àteros bòlidos finas a su 31 de su mese de idas de su 2024: intro e sena sartare is 15 dies dae sa data de su bòlidu fatu.
Sa protzedura telemàtica ghiada permitit a s'impitadore de su trasportu aèreu, a pustis de s'èssere fatu reconnòschere cun SPID, de compilare sa rechesta de contributu e de fàghere minitoràgiu de su contributu, de fàghere verìficas a subra de is rechisidos.
Sa dimanda dda at a arrichire su Comunu anca tenet sa residèntzia s'impitadore e a pustis de apuramentos at a incarrerare a pagare su rimborsu.
Po nde ischire de prus tocat a andare a su giassu istitutzionale de sa Regione Sardigna
