Sa Regione Autònoma de Sardigna at istituidu sa sessione noa “segunda sessione maju de su 2024” de tzertificatzione provisòria isperimentale de sa connoschèntzia de sa limba sarda – livellu C1.
Podent pigare parte a s'avisu is chi tenent 18 annos fatos de edade, chi tenent sa tzitadinàntzia italiana o de unu de is Paisos membros de s'Unione Europea.
Sa tzertificatzione in chistione est una premialidade in is protzeduras pro seberare operadores de Isportellos Linguìsticos e de sa formatzione e est tìtulu pro si fàghere ammìtere a s'iscritzione a s'elencu de is dotzentes e pro pòdere fàghere dotzentes de foras calificados.
Is chie tenent bidea de fàghere dotzentes de limba sarda e imparare is limbas minoritàrias a is istudiantes in is iscolas ant a dèpere intregare dimanda de iscritzione a s'Elencu regionale de is dotzentes.
Is chie tenent bidea de fàghere dotzentes de foras calificados ddos ant a seberare in deretura is Istitutziones iscolàsticas benefitziàrias de is finantziamentos de sa RAS.
Sa dimanda pro pòdere pigare parte, cumpilada in totu is partes suas in mòdulu aposta e firmada a manera digitale o cun firma autògrafa, si depet mandare intro e sena de sartare is mesudie de s'8 de abrile de su 2024, sceti a posta eletrònica tzertificada a s'indiritzu pi.cultura@pec.regione.sardegna.it
Sa dimanda, chi si mandat a PEC, tocat de dda cumpilare cun unu programma de videoscritura, sena de dda iscriri a manu, e depet èssere a unu documentu sceti in formadu .pdf firmadu a manera digitale o a firma autògrafa aunende-nche unu documentu de identidade pro pòdere apurare sa firma.
Is dimandas ddas ant a registrare sighende s'òrdine cronològicu de arribu e s'ant a ammìtere sceti is primos 150 candidados chi tenent apostu sa dimanda e rechisidos.
Acontessende de lòmpere in tempus 150 dimandas, chi si podent ammìtere, sa RAS decrarat cun avisu de serrare in antis de s'8 de abrile su tèrmine pro intregare sa dimanda.
Is candidados ammìtidos a fàghere sa prova de su 7 de maju de su 2024 chi non nde pigant parte sena de àere donadu comunicadu intro de su 27 de abrile de su 2024 e sena de motivu giustificadu atestadu dae tzertificatzione, perdent su deretu a sa sessione afatante.
Su 12 de abrile a sa ora de is 3:30 de merie, in sa Facultade de is Istùdios Umanìsticos (fràigu de Psicologia, àula 4B) s'at a fàghere un'atòbiu pro familiarizare cun s'esàmene de tzertificatzione de sardu C1.
Pro nde ischire de prus tocat a andare a s'indiritzu https://forms.gle/6BLY3cw2TFRxKYiY9
Pro crarimentos tocat a mandare una punta de billetu a s'indiritzu de posta eletrònica pi.cultura.sarda@regione.sardegna.it
