Eris mangianu sa Regione at bogadu a campu sos datos in contu de su sistema de regorta diferentziada de su 2021, a pustis fata sa validatzione de Arpas tenende contu de sas informatziones trasmìtidas dae sos Comunes.
In provìntzia de Aristanis, sa bellesa de 9 comunes ant superadu s’80% de refudos diferentziados. Bi nd’at 6 (Gonnostramatza, Masuddas, Mòguru, Pompu, Sìmaba e Siris) chi sunt imbàtidos a s’81,95%. Sighit Làconi cun s’81,76%, Boàtiri cun s’81,08% e Crabas cun s’81,07%.
S’Assessoradu regionale de sa Difesa de s’Ambiente at istabilidu chi custos comunes potzant tènnere unu minimamentu de sa Tari de su 50%.
In Aristanis sa regorta diferentziada abarrat firma a su 79,87% e at a tènnere unu minimamentu de su 40%.
Sa peus resurtada l’at tenta Cùglieri, chi in su 2021 at fatu ebbia su 72,84%, forsis ca tenet su problema de sas marinas.
Finas Santeru no at fatu una bona resurtada, cun su 73,13% (inoghe puru tocat a contare sos datos negativos de sas marinas), nen Baulau, Bonàrcadu, Milis, Nurachi, Santu Lussurzu, Sèneghe, Sinnarìolo, Tramatza e Tzeddiani chi tenent su 73,32%. Cun custas mèdias, su minimamentu de sa Tari est de su 30%.
(GF.P.)
