Chentu mìgia èuros de agiùnghere a sos chi fiant destinados a sa premialidade/penalidade istituida in sos impiantos pro eliminare sos refudos. Est su chi tocat a su Cunsòrtziu industriale provintziale de Aristanis a pustis de sa divisione de sos 2 milliones de èuros postos a cùrrere dae sa Regione Sardigna pro mesu de sos Assessorados a sa Difesa de s’Ambiente e de su Bilàntziu.
Àteros 100mìgia èuros peròmine ant a andare a su Cunsòrtziu industriale provintziale de Biddexidru, a su Cunsòrtziu pro sa zona industriale de Macumere e a su Cunsòrtziu pro sa zona de isvilupu industriale de Chilivani-Otieri, e 1,6 milliones de èuros a su Cunsòrtziu industriale provintziale de Casteddu, “pro chi los potzant impreare pro aplicare sas premialidades de su 2022 e pro pagare sas de sos annos passados” at craridu s’assessore regionale de sa Difesa de s’Ambiente Gianni Lampis.
“Su dinari pro sa premialidade/penalidade est a finitia, e cun custu cherimus dare un’agiudu - at naradu Lampis -. Difatis su dinari abarradu in sos impiantos non bastat a dare sas premialidades chi si diant pòdere aplicare in su 2022”.
“Pro su Pranu regionale de gestione de sos refudos, sa Sardigna devet imbàtere a s’80% in sa regorta diferentziada de sos refudos urbanos intro de su 31 de nadale de su 2022. Su trastu de sa premialidade/penalidade paret chi fatzat efetu, tantu chi dae su 2,8% semus imbàtidos a su 74,2% in su 2020, ponende sa regione nostra in su segundu postu in Itàlia” at finidu Gianni Lampis.
(GF.P.)
